សាលាដុនបូស្កូ មានបំណងចង់ឲ្យយុវជនយុវនារី ចូលរួមយ៉ាងស្វាហាប់ក្នុងដំណើរជីវិត និងប្រទេសរបស់ពួកគេ ហើយធ្វើការទាំងអស់គ្នា ដើម្បីបម្រើមនុស្សទាំងអស់ឲ្យរួចផុតពី ភាពភ័យខ្លាច ភាពក្រីក្រ ហិង្សា អសន្តិសុខ ព្រមទាំងភាពស្រេកឃ្លាន។
កាលពីថ្ងៃទី ១៣ ដល់ថ្ងៃទី១៦ ខែសីហា ឆ្នាំ២០១២ សាលាដុនបូស្កូខេត្តព្រះសីហនុ បានរៀបចំសម្ភាសន៍ សិស្សថ្មី ដើម្បីចូលរៀននៅឆ្នាំសិក្សាថ្មី ២០១២-២០១៤ ដែលមានលើមុខជំនាញ
ផ្នែកអគ្គិសនី ផ្នែកយន្តសាស្រ្តទូទៅ ផ្នែកយន្តសាស្រ្តរថយន្ត ផ្នែកលេខាធិការ ផ្នែកទំនាក់ទំនងសង្គមនិងសារព័ត៌មាន ផ្នែកបដិសណ្ឋារកិច្ច ផ្នែកសេវាកម្មម្ហូបអាហារ និងភេសជ្ជៈ ផ្នែកចុងភៅ និងផ្នែកគេហកិច្ច។
បើតាមមតិរបស់លោកឪពុក(អ្នកបួសក្នុងសាសនាកាតូលិក)
ចន វ៉ីសស័រ អធិការសាលាដុនបូស្កូ ខេត្តព្រះសីហនុ បានមានប្រសាសន៍កាលពីថ្ងៃទី១៨ ខែសីហាឆ្នាំ២០១២ នេះថា៖ “ នៅថ្ងៃទី១៧ យើងមានសិស្សមកសម្ភាសន៍ និងប្រលងចំនួន ៨៧១នាក់ តែយើងចែកពាក្យអស់ ១២០០ច្បាប់”។
លោកគ្រូ ញានភឿន បានមានប្រសាសន៍ថា សិស្សដែលបានជាប់សរុបមានចំនួន ៣៣៥នាក់ ទាំងខេត្តព្រះសីហនុ និងខេត្តកែប ហើយទាំងផ្នែកបច្ចេកទេស និងផ្នែកសណ្ឋាគារ។ ហើយពួកគេមកពីខេត្តផ្សេងៗ ដូចជា កំពត កំពង់ស្ពឺ កំពង់ឆ្នាំង ព្រៃវែង ស្វាយរៀង បាត់ដំបង ពោធិ៍សាត់ ភ្នំពេញ កណ្តាល សៀមរាប បន្ទាយមានជ័យ តាកែវ ប៉ៃលិន កំពង់ចាម កំពង់ធំ កែប រួមទាំង ខេត្តព្រះសីហនុផងដែរ។
លោកអ៊ុំ ចិនម៉ៅ ជាអាណាព្យាបាលរបស់បេក្ខជនប្រលង លោកអ៊ុំបានមានប្រសាសន៍ថា លោកអ៊ុំសប្បាយរីករាយណាស់ដែលមានសាលាដុនបូស្កូ ផ្តល់ជំនាញដល់យុវជន យុវនារីឲ្យបានទទួលសម្រាប់់ថ្ងៃអនាគតរបស់ពួកគេ ដើម្បីអភិវឌ្ឍប្រទេសជាតិឲ្យមានភាពរីកចម្រើន។
យុវសិស្សនូរ៉ាពិសិដ្ឋ បាននិយាយថា៖”ខ្ញុំបានទទួលដំណឹងពីសាលា ដុនបូស្កូនេះតាមរយៈ ការចែកខិតប័ណ្ណ ហើយខ្ញុំមានអារម្មណ៍ រីករាយណាស់ដែលបានដឹងថាខ្លួនបានមករៀននៅសាលានេះ ហើយខ្ញុំសន្យាថានឹងខំរៀនដើម្បីឲ្យមានចំណេះដឹងសម្រាប់ជួយដល់គ្រួសារ ជួយដល់សង្គម និងជួយខ្លួនឯង”
គួរបញ្ជាក់ផងដែរថា សាលា ដុនបូស្កូ ខេត្តព្រះសីហនុ មានឈ្មោះបោះសម្លេង ដោយសារ វិន័យ សីលធម៌ និង ជំនាញដល់សិស្សានុសិស្ស ដោយរៀបចំកម្មវិធីសិក្សា ទ្រីស្តី ៣០% និងអនុវត្តន៍ ៧០% ដើម្បីឲ្យពួកគេចេះធ្វើការងារក្នុងសង្គមបាន។
ព័ត៌មានដុនបូស្កូ 